ཁྱོད་ཀྱི་མདུན་དུ་ཐོན་ཡོད།
མེ་སྟག་མཆེད་པའི་ཁྲག་རྩའི་སྦུབས་སུ།།
མི་རིགས་ཤིག་གི་རྣམ་ཤེས་བཅུག་ཡོད།།
རྒྱུ་འབྲས་འཛོམ་པའི་རྒྱལ་ཁབ་ཅིག་གི །
མངའ་ཐང་སྲུང་བའི་དམ་བཅའ་བཞག་ཡོད།།
ལོ་དང་ཟླ་བའི་ཀྱོག་མཚམས་རེ་ན།།
མེ་དཔུང་ལྟ་བའི་སྙན་ངག་བྲིས་ཡོད།།
ལྷིང་འཇགས་འཁྱིལ་བའི་རི་གྲོང་དག་ནས།།
ངུ་སྐད་བྲག་དམར་ཐེམ་ལ་བསྐྱལ་ཡོད།།
ཕྲ་ལ་སྦོམས་པའི་སྲོག་གི་སྐུད་པ།།
འཇིག་ཉེན་ཚོར་བའི་གྲོགས་སུ་འཐེན་ཡོད།།
གཞན་བསྒྱུར་སྲིད་ཀྱི་འགག་མདོ་རེ་ན།།
མི་གཤིས་སྲུང་བའི་དར་ཆེན་བཙུགས་ཡོད།།
གཞས་ཆུང་ཕྲ་མོའི་དབྱངས་རྟ་རེ་ན།།
འཚོ་བའི་ལམ་གྱི་བདེན་པ་བཅོལ་ཡོད།།
ཐུན་མིན་རིས་ཀྱི་འགྲོ་བ་ཞིག་གི །
བདེ་སྡུག་ང་ཡི་མགྲིན་པར་བཏགས་ཡོད།།
ལུས་སེམས་ཡོད་ཚད་རྨ་ཁས་གཡོག་པས།།
གདུང་བའི་ངལ་བ་སངས་ཐབས་དཀའ་ཡང།།
དབྱངས་གསལ་སོ་བཞིའི་མཛེས་སྡུག་རུམ་ནས།།
དེ་རིང་ཁྱོད་ཀྱི་མདུན་ན་ཐོན་ཡོད།།
No comments:
Post a Comment