འཚོ་བའི་རྒྱབ་ལྗོངས་རྙེད་པར།།
དཀའ་ལས་དེ་ཙམ་མི་འདུག
།བདེན་པ་མཐོང་བའི་སྨྱུག་རྩེ།།
སྲིད་པའི་གྲོང་ལ་བཀོལ་ཡོད།།
རང་དབང་འཚོ་བའི་གླུ་སྐད།།
ལ་དང་ལུང་ནས་གྱེར་ཡོད།།
མཚན་མོའི་ལྷིང་འཇགས་བཅོམ་པར།།
གླུ་སྐད་ཅིག་གི་ཆོག་འདུག
།རྩ་ཐང་སྙན་ངག་འདྲ་བོ།།
ཕྱི་མིག་ཁྲོད་ནས་ལུས་སོང་།།
སྦྲ་ནག་འཚོལ་བའི་ལམ་དུ།།
མ་ཎི་མགུར་དབྱངས་ཁྱབ་འདུག།
མཐིང་སྨུག་སྦྲ་ཡི་ཁྱོན་ཐག།
སྲིད་པའི་ཡུལ་ལ་འཐེན་ཡོད།།
ཨ་ཅེ་འབྲོག་མོའི་བརྩེ་སེམས།།
འབྲི་དང་འོ་མར་བཅོལ་ཡོད།།
དབྱངས་གསལ་སོ་བཞིའི་མཛེས་པར་།།
སྲོག་དང་རྣམ་ཤེས་བརླན་པས།།
རླུང་གིས་ཁུར་བའི་རྗེས་ཤུལ།།
སླར་ཡང་འཚོལ་དགོས་བྱུང་ཡོད།།
ཉེན་ཁའི་མདུན་དུ་ལངས་བ།།
ང་ཡི་སྤུན་ཟླ་ཡིན་འདུག།
སྨུག་པའི་བསེབ་ནས་བོར་བ།།
ང་ཡི་ལེགས་བཤད་ཡིན་འདུག།
No comments:
Post a Comment